देव्हाऱ्यातल्या देवा जरा धरणीवर ये
आमची बी चटणी भाकर
जरा पदरात घे
लाडवाच गोडव सोडून चटणीच तिखट
जरा उदरात घे
देव्हाऱ्यातल्या देवा जरा धरणीवर ये
मोत्याच ओरडण सोडून कोळशाचे रडण
जरा ऐकून घे
सोन्याच्या देवा जरा
काळ्या मातीत लोळण घे
देव्हाऱ्यातल्या देवा जरा धरणीवर ये
चांदीचा गाभारा सोडून
जरा रानाच्या आसऱ्याला ये
फुलाच ओझ फेकून
जरा तू औताला ये
देव्हाऱ्यातल्या देवा जरा धरणीवर ये
धुपाचा गंध सोडून
जरा शेणाचा दर्प तू घे
मागणाऱ्याला वरदान सोडून
आमच्या वेदनेला तुझ्या
आसवांचे दोन थेंब तरी दे
देव्हाऱ्यातल्या देवा जरा धरणीवर ये
जरा धरणीवर ये
- अ. शि. फुंदे
No comments:
Post a Comment